Shugaban kasar Faransa François Hollande ya bayyana a jiya Talata cewa, kungiyar EU da kasar Amurka ba za su amince da yarjejeniyar cinikayya da raya dangantakar abokantaka ta zuba jari a yankin tekun Atlantic wato TTIP a takaice da aka tattauna, kafin karshen wannan shekarar ba.

Hollande ya bayyana yayin da yake jawabi a gaban tawagar wakilan jakadun kasashe dake kasar Faransa a wannan rana cewa, an shiga wani mawuyacin hali a tattaunar da ake yi kan yarjejeniyar yin ciniki maras shinge a tsakanin Turai da Amurka. Wannan ya sa, ake fuskantar rashi daidaito sosai a tsakanin Turai da Amurka, kana ba a girmama matsayin kungiyar EU ba. A ganinsa, hanya mafi dacewa ita ce duba hakikanin halin da ake ciki, ba ci gaba da yin tattauna bisa yanayin da ake a yanzu ba.

Sakataren kula da harkokin ciniki da kasashen waje na kasar Faransa Matthias Fekl ya bayyana a wannan rana cewa, kasar Faransa za ta shawarci hukumar kungiyar EU a watan Satumba na bana da nufin dakatar da yin tattaunawa kan yarjejeniyar yin ciniki cikin 'yanci a tsakanin Turai da Amurka. (Zainab)