A jiya ne shugaba Barack Obama na Amurka ya zanta da takwaransa na kasar Rasha Vladimir Putin, ta wayar tarho kan wasu batutuwan kasa da kasa.

Batutuwan da shugabannin biyu suka tattauna sun hada da rikicin kasar Ukraine, da shirin tattauanawar zaman lafiya na kasar Syria, da kuma gwajin makamin nukiliya na baya-bayan da kasar Koriya ta Arewa ta yi.

Bugu da kari, shugaba Obama ya jaddada muhimmancin amfani da hanyar diflomasiya wajen warware rikicin kasar Ukraine ta hanyar aiwatar da yarjejeniyar Minsk da dukkan bangarorin biyu suka rattabawa hannu.

A dangane da batun Syria kuwa, shugabannin biyu sun bukaci da a hanzarta aiwatar da kudurin da kwamitin sulhu na MDD ya amince da shi game da rikicin kasar ta Syria. Sai dai shugaban biyu sun amince da a kara daukar matakan da suka dace na ganin an tattauna tsakanin wakilan 'yan adawar kasar da gwamnatin kasar karkashin kulawar MDD a kokarin da ake na rage kaifin rikicin kasar da kuma yanayin jin kai da al'ummar kasar ke ciki.

Daga karshe Obama da Putin sun tattauna muhimmancin hadin gwiwar kasa da kasa don mayar da martani game da gwajin makamin nukiliyar da kasar Koriya ta Arewan ta yi.(Ibrahim)