Dan wasan kwallon tebur ta Snooker daga kasar Sin Liang Wenbo, ya doke takwaransa na kasar Ingila David Grace da ci 6 da 4, matakin da ya ba shi damar kaiwa ga wasan karshe na gasar dake gudana a kasar Birtaniya. Yanzu haka dai Liang zai kara ne a wasan karshe, da dan wasa dake matsayi na uku a duniya wato Niel Robertson daga kasar Australia.

Kafin kammala wasan da Liang ya buga da David Grace, sai da 'yan wasan biyu suka shafe sa'oi 5 suna dauki ba dadi gaban 'yan kallo. Yanzu haka kuma Liang wanda ke matsayi na 29 a duniya ya samu dama ta biyu a tarihin wasannin sa, inda ya sake zuwa wasan karshe, bayan da a shekarar 2009 ya samu irin wannan dama a birnin Shanghai, amma a wancan lokaci Ronnie O'Sullivan dan kasar Birtaniya ya lashe gasar ta duniya ajin kwararru.

Tuni dai Liang ya samu gurbin shiga gasar da 'yan wasan 16 mafiya kwarewa za su buga a fadar Alexandra dake birnin Landan cikin watan Janairu mai zuwa.

A sauran wasannin da aka buga kuwa, Robertson wanda shi ne zakaran gasar Snooker na shekarar 2013, ya lallasa mai rike da matsayi na daya a duniya wato Mark Selby da ci 6 da nema a wasan daf da na karshe.(Saminu Alhassan)