Shugaban Xi Jinping na kasar Sin ya bukaci JKS da kuma jami'an gwamnatin kasar da su himmatu wajen ganin an aiwatar da gyare-gyaren da aka tsara ta yadda kwalliya za ta biya kudin sabulu.

Shugaba Xi ya yi wadannan kalamai ne yayin taron babban kwamitin kula da yin gyare-gyare na kasa karo na 15.

Tun lokacin da aka fara zurfafa yin gyare-gyare a sassa daban-daban na kasar, aka fara ganin kyakkyawan sakamako a farkon wannan shekara.

Don haka ya jaddada cewa, wajibi ne bangaren JKS da gwamnati a dukkan matakai su kara zage damtse da nuna juriya wajen kara zurfafa yin gyare-gyare, tare da fito da matakan magance sabbin matsalolin da suka kunno kai yayin da ake aiwatar da wadannan gyare-gyare.

A karshen shekarar 2013 ne aka kafa wannan kwamiti domin sa-ido kan yadda shirin zurfafa yin gyare-gyaren ke gudana.

Taron na yau Talata ya samu halartar manyan shugabannin da suka hada da firaminista Li Keqiang, Liu Yunshan da kuma mataimatin firaminista Zhang Gaoli. (Ibrahim)