Dakarun rundunar hadin gwiwar kungiyar AU da kasar Somaliya, sun fatattaki mayakan Al-Shabaab daga wasu kauyuka dake yankin Hiram na tsakiyar kasar Somaliya bayan wani kazamin fada.
Magajin yankin Hiram Abdifitah Hassan Afrah ne ya tabbatarwa kamfanin dillancin labaru na Xinhua hakan ta wayar tarho, ya na mai cewa sojojin tawagar AU sun rika ruwan wuta ta sama kan mayakan na Al-Shabaab, yayin da kuma sojojin kasar Somaliya ke kai hare hare ta kasa.
Afrah ya ce bayan tsahon lokaci ana gumurzu a jiya Alhamis, an samu nasarar korar 'yan Al-Shabaab din daga wasu kauyuka 4, kana an hallaka dakarun su masu yawa. Ya kuma ce ba a samu asarar rayuka daga bangaren dakarun AU ko na kasar Somaliya ba.(Saminu Alhassan)
