Kakakin runduna ta 7 ta sojojin Najeriya Kanar Tukur Gusau wanda ya bayyana hakan cikin wata sanarwar da aka rabawa manema labarai a garin Maiduguri, fadar mulkin jihar Borno, ya kuma ce dakarun sun yi nasarar gano wasu wuraren da ake kera makamai da sauran abubuwan fashewa.
Kakakin ya kuma nanata kudurin sojojin na tabbatar da cewa, an kawar da mayakan na Boko Haram tare da mai da zaman lafiya a yankin baki daya.
A 'yan kwanakin nan ne kuma dakarun sama da na kasa suka yi nasarar lalata sansanonin mayakan na Boko Haram yayin wani samamen hadin gwiwa da suka kaddamar a shiyyar. (Ibrahim)
