Kocin Barcelona Luis Enrique ya ce kulaf din sa na da cikakkiyar dama, ta cimma manyan nasarori, duk da doke su da Manchester United ta yi da ci 3 da 1 a birnin San Francisco, a wasan share fagen shiga kakar wasanni mai zuwa.

Enrique ya ce rashin sa'a ne kawai ya sanya Manchester basu ruwa, kuma duk da wannan rashin nasara da suka samu ya yi amannar cewa 'yan wasan sa sun yi iyakacin ikon su.

"bamu yi wasa irin wanda ake fatan gani ba, amma babu damuwa, domin kuwa muna da lokaci tun daga nan zuwa 11 ga watan Agusta, na gudanar da gyare-gyare" a kalaman koci Enrique.

Kaza lika kocin na Barcelona ya bayyana karawar da suka yi da manyan kulaflika a baya bayan nan, a matsayin wata hanya ta kimtsawa, yana mai cewa nan gaba kadan za su fara buga gasar zakarun turai, da kuma ta kofin kalubale na Sifaniya. (Saminu Alhassan)