Wata tawagar horas da 'yan wasan Kwando karkashin hukumar NBA, wadda tsohon shahararren dan wasan Canada Steve Nash zai jagoranta, za ta ziyarci kasar Cuba cikin wannan wata na Afirilu, ziyarar da za ta kasance irin ta ta farko da tawagar hukumar za ta kai Cuba, tun bayan da Amurka da Cuban suka bayyana aniyar su, ta maido da huldar diplomasiyya cikin watan Disambar da ya gabata.

Game da wannan lamari, hukumar gudanarwar kwallon Kwando ta kasar Cuba, ta ce matakin da NBA da takwarar ta ta FIBA suka dauka, na horas da karin matasa a fannin wasan kwallon Kwando abu ne mai matukar amfani.

Rahotanni sun nuna cewa cikin shirin hukumar ta NBA, hadda tsarin gyara filayen wasan kwallon Kwando 3, da bada horo ga matasa a fannin wasan a yankuna 2 dake birnin Havana.

A nasa tsokaci, shugaban hukumar FIBA Horacio Muratore, bayyana godiyar sa yayi game da wannan dama da aka samarwa matasan kasar ta Cuba, matakin da zai tallafa matuka ga masu sha'awar wasan kwallon kwando. Ya kuma tabbatar da cewa za su yi hadin gwiwa da NBA wajen cimma nasarar da aka sanya a gaba.

Wannan dai shiri zai gudana ne karkashin tsarin hukumar NBA, da hadin gwiwar FIBA, tare da goyon bayan hukumar wasanni ta kasar Cuba. (Saminu Alhassan)