Hukumomin sojan Najeriya sun bayyana cewa, wani jirgin sama mai saukar ungulu na sojan kasar ya fadi a yankin kudancin Bama da ke jihar Borno mai fama da tashin hankali da ke arewa maso gabashin Najeriya.
Kakakin hukumar tsaron kasar Chris Olukolade ya bayyana cewa, jirgin mai lamba Mi-35 ya fadi ne sakamakon matsalar na'urar da ya samu a lokacin da yake a wani aikin horo a yankin na Bama da ke jihar ta Borno.
Jami'in ya ce, babu wanda ya jikkata sanadiyar hadarin, ko da yake an fara gudanar da bincike don gano musabbin hadarin. Duk da cewa sojojin na artabu da mayakan kungiyar Boko Haram a yankin, amma ba harbo jirgin aka yi ba. (Ibrahim)
