Shugaban kasar Senegal kuma jagoran jam'iyyar APR Macky Sall, ya gana da tawagar sada zumunta ta jam'iyyar kwaminis ta kasar Sin, karkashin jagorancin Yu Hongjun mataimakin shugaban hukumar kula da harkokin cudanya da ketare na kwamitin tsakiyar JKS.

Yayin ganawar tasu a jiya Talata 13 ga wata a birnin Dakar, Mr. Yu ya bayyana cewa, jam'iyyar JKS na mayar da hankali kan bunkasa dangantakar dake tsakaninta da jam'iyyu daban daban na kasar Senegal, ciki har da APR.

Haka nan Sin na fatan ganin an karfafa cudanya tare da jam'iyyun, don ciyar da dangantakar dake tsakanin kasashen biyu a duk fannoni gaba.

A nasa bangaren, shugaba Sall ya bayyana cewa, jam'iyyarsa na fatan koyon fasahohin raya jam'iyya, da JKS ta samu, musamman ma ta fuskar ladabtarwa, matakin da ya ce zai taimaka wajen karfafa hadin kai, da dinkewar jam'iyyar. Baya ga karfafa matsayinta a fagen jagorancin kasar ta Senegal. (Bilkisu)