Labarin da jaridar ta fitar ya bayyana cewa, Iran wadda ta fada rukuni na 6 wato rukuni na F, tare da Argentina, da Najeriya, da Bosnia da kuma Herzegovina, za ta kara da Mozambique din ne a ranar 7 ga watan Mayu, ko da yake kawo yanzu ba a sanar da wurin da za a gudanar da wasan ba tukuna.
Bayan wasan, kungiya ta Iran za ta tafi kasar Austria, inda za ta kara da Belarus, da Montenegro, da kasar Angola, a ci gaba da kokarin share faren gasar cin kofin duniya.
An kuma ce Iran din za ta yi wasan ta na sada zumunci na karshe, kafin wasannin cin kofin na duniya ita da Trinidad da Tobago, a ranar 8 ga watan Yuni, a birnin Sao Paolo na kasar Brazil.
A gasar cin kofin na duniya kuwa, Iran za ta buga wasanta na farko ne da Najeriya a ranar 16 ga watan Yuni, a birnin Curitiba na kasar Brazil.(Bello Wang)
