140320murtala.m4a

Shugaban Najeriya Goodluck Jonathan ya amince da nada Mai Shari'a, Zainab Bulkachuwa a matsayin shugabar kotun daukaka kara ta kasa, sa'annan shugaban ya aika sunanta zuwa zauren majalisar dattawa, don tabbatarwa, sakamakon dole sai sun tabbatar da nadin kafin a rantsar da ita, kamar yadda dokar tsarin mulkin kasa ta tanada.

Mai Shari'a Zainab Bulkachuwa za ta shugabanci kotu mai daraja ta biyu a kasar, wanda hakan zai sa a lokaci guda mata ke jagorantar manyan kotunan kasar nan mafiya daraja a karon farko.

Babbar jojin kasa, Mai Shari'a, Maryam Alooma Mukhtar, wadda ita ce mace ta farko da ta fara rike matsayin da shugaba Jonathan ya nada ta ne a shekarar 2012, yayin da duk a shekarar ya nada Zainab Bulkachuwa, mataimakiyar shugaban kotun daukaka karar, bayan murabus din Mai Shari'a Dalhatu Adamu.

Bulkachuwa wadda aka haifa a watan Maris na 1950, wakiliya ce daga jihar Gombe a kotun daukaka kara a tarayya.(Murtala)