A yunkurinta na sake dawo da kyakkyawan yanayin zaman lafiya da tsaro a gundumar Pibor, dake kasar Sudan ta Kudu, tawagar wanzar da zaman lafiya ta MDD ko UNMISS a takaice, ta fara gudanar da wani sintiri na rana rana a wannan yanki, wanda a baya ya sha fama da rikice-rikice da tashe-tashen hankula da dama.
Kakakin babban magatakardar MDD Martin Nesirky ne ya bayyana hakan ga manema labaru a ranar Talata. Nesirky ya ce, burin tawagar ta UNMISS ne ta ga ta kare fararen hula daga dukkanin barazanar mahara, tare da samar musu damar zirga-zirga a wuraren da za su samu tallafi na ababen bukatun yau da kullum.
A cewarsa, sintirin da aka fara gudanarwa, na samun tallafi daga dukkanin jami'an tsaron yankin, kuma tawagar MDD na kokarin gano mutanen da suka tsere daga gidajensu, sakamakon fadace-fadacen da suka addabi yankin na Pibor, da Gumuruk, da ma ragowar sassan da ke fama da matsalolin tsaro. (Saminu)
