A tsakiyar ranar Lahadi 18 ga wata da misalin karfe 12, kwamitin rage yawan bala'u da ma'aikatar harkokin jama'ar kasar Sin sun dauki matakan gaggawa na aikin ceto bisa mataki na hudu na kasar Sin domin tinkarar bala'in ambaliyar ruwa da ruwan sama kamar da bakin kwarya da ake fama da su a lardin Guangdong, kuma sun tura wani rukunin ma'aikata zuwa yankin dake fama da bala'un domin kula da yanayin da ake ciki a can, tare da taimakawa masu fama da bala'un a fannin rayuwa.

Bisa rahoton da hukumar harkokin jama'a ta lardin Guangdong ta bayar, an ce, a sakamakon mahaukaciyar guguwa ta Utor, mafi yawan yankunan wannan lardi suna fama da bala'un ruwan sama kamar da bakin kwarya, da ambaliyar ruwa da zabtarewar kasa daga tsaunuka da sauransu, wadanda suka yi illa ga rayuwar jama'a miliyan 4.16 daga birane 18, a cikinsu kuma mutane 20 sun mutu yayin da wasu 7 suka bace.

An tsugunar da mutane dubu 513 cikin gaggawa. Gidaje dubu 26 sun lalace. Jimillar hasarar kai tsaye dai ta kai yuan biliyan 4.9.

Kawon yanzu, hukumar harkokin jama'a ta lardin Guangdong ta riga ta dauki matakan aikin ceto bisa mataki na biyu, kuma ta tura wani rukunin aiki domin yin bincike kan yanayin da ake ciki, tare da kebe kayayyakin agaji, domin tsugunar da masu fama da bala'in yadda ya kamata.(Fatima)