Gwamnatin riko ta kasar Masar ta rantsar da gwamnoni wa daukacin gundumomin kasar illa guda biyu, in ji rahoton da kamfanin dillancin labaran kasar, MENA, ya bayar ranar Talata.
Garambawul din da aka yi ya kunshi gwamnoni guda 18, guda shida za su ci gaba kan matsayinsu, kana an yi wa guda daya sauyi daga gundumar Red Sea zuwa Alexandria.
To amma kuma, ba'a nada sabbin gwamnoni wa Red Sea da Minufiya ba.
Baki daya dai akwai gundumomi guda 27 a kasar Masar. Galal al-Saeed shi ne aka nada a matsayin sabon gwamnan babban birnin kasar, Alkahira. (Lami)
