Bayan da aka yi bikin maraba, shugabannin biyu wato Dr. Goodluck Jonathan, da Mr. Jacob Zuma, sun yi wata ganawar sirri. Daga baya kuma, Jacob Zuma yayi ma kafofin watsa labarai wani jawabi, inda ya ce, a cikin shawarwarin da yayi tare da Jonathan, ba ma kawai sun tattauna ne kan batutuwan da suka shafi kasashensu ba, a'a harma sun tabo magana kan wasu batutuwan da suka shafi nahiyar Afirka baki daya, ciki har da harkar tsaro.

A dayan bangaren kuma, Mista Jacob Zuma ya ce, shekarar da muke ciki, shekara ce ta cika shekaru 50 da kafa kungiyar hadin-kan Afirka, wadda ita ce tsohon salon kungiyar tarayyar kasashen Afirka ta yanzu, wato AU. Shugabannin biyu sun yi musanyar ra'ayi dangane da yadda za'a yi domin karfafa rawar da kungiyar AU ke takawa a halin yanzu, da kuma a nan gaba.