A jiya Talata ne, kasar Birtaniya da kungiyar EU suka cimma daidaito kan yarjejeniyar ficewar Birtaniya daga kungiyar ta EU. Wannan wani babban ci gaba ne da aka samu tun bayan da aka fara yin shawarwari game da wannan batu a cikin shekara fiye da daya.

Jami'in watsa labaru a fadar firaministan kasar Birtaniya Rob Macpherson ya bayyanawa 'yan jarida cewa, Birtaniya da kungiyar EU sun cimma daidaito a karshe, amma ba a bayyana abubuwan dake cikin yarjejeniyar ba.

Jami'in ya bayyana cewa, firaministar kasar Birtaniya Theresa May za ta shugabanci taron majalisar ministocin kasar a yammacin yau, don yi musu bayani game da abubuwan dake kunshe cikin yarjejeniyar da ma shirye-shiryen da za a aiwatar a nan gaba.

A halin yanzu, kafofin watsa labaru na kasar Birtaniya sun maida hankali sosai ga batun iyakar kasar da Ireland a cikin yarjejeniyar ficewar Birtaniya daga kungiyar EU. Firaministar kasar Birtaniya ta taba bayyanawa a watan da ta gabata cewa, an kammala kashi 95 cikin dari na shawarwarin ficewar Birtaniya daga EU, batun iyakar kasar da Ireland shi ne kawai ba a cimma daidaito a kai ba. (Zainab)