A jiya Jumma'a mujallar Fast Company na kasar Amurka ta sanar da jerin sunayen kamfanoni 10 wadanda suka fi mallakar fasahohi masu ci gaba a fannin makamashi a duniya. Cikinsu, kamfanin BYD na kasar Sin ta zama na 2 bisa yadda ya kirkiro babbar mota mai daukar kaya dake yin amfani da wutar lantarki ta farko a duniya. Yayin da kamfanin da ya zama na farko a cikin jerin, shi ne kamfanin Green Mountain Power na kasar Amurka, wanda bisa fasahohin da ya gabatar ya sa jama'a su samu damar zama nisa da layoyin wutar lantarki ba tare da gamuwa da matsalar karancin lantarki ba.

Bisa bayanan da majallar Fast Company ta gabatar, kamfanin mafi girma a fannin samar da motocin wutar lantarki ba kamfanin Tesla na kasar Amurka ba, a hakika shi ne kamfanin BYD na kasar Sin. Kamfanin, wanda ma'anar takensa ita ce "Cimma burinka", ya fara da samar da batir. Daga bisani ya yi amfani da fasahohin da ya samu a wannan fanni domin tsara tare da samar da motocin wutar lantarki, tun da yadda irin wannan mota za ta yi aiki na dogaro kan ingancin batir da aka ajiye a cikinta.

A nata bangaren, Stella Li, babban darektan kamfanin BYD mai kula da harkokinsa a yankin arewacin nahiyar Amurka, ta ce, tana alfahari da kyautar da kamfaninta ya samu a wannan karo. A cewar ta, kamfanin BYD yana tsayawa kan kokarinsa na kirkiro sabbin fasahohi a fannin makamashi, wadanda suke da inganci, da tsaro, gami da dorewar aiki.(Bello Wang)