Asusun bada lamuni na duniya wato IMF ya gabatar da rahoton hangen makomar tattalin arzikin duniya a birnin Davos dake kasar Switzerland a ranar 22 ga wata, inda ya yi nuni da cewa, bayan shekarar 2018, tattalin arzikin duniya ya shiga lokacin samun bunkasuwa cikin sauri. Asusun IMF ya riga ya daga hasashen bunkasuwar tattalin arzikin duniya na shekarar 2018 da na 2019 zuwa kashi 3.9 cikin dari, wanda ya karu da kashi 0.2 cikin dari bisa na bara. Kuma an yi hasashen cewa, tattalin arzikin Sin zai ci gaba da samun bunkasuwa yadda ya kamata, har ma saurin ci gabansa zai kai kashi 6.5 cikin dari.

Rahoton ya yi nuni da cewa, asusun IMF ya daga hasashen bunkasuwar tattalin arzikin duniya na shekaru masu zuwa ne, domin ya yi la'akari da bunkasuwar kasashe masu ci gaban tattalin arziki, da kuma kwaskwarimar tsarin haraji na kasar Amurka, da shirye-shiryen sa kaimi ga bunkasuwar tattalin arzikin kasar wadanda za su bunkasa tattalin arzikin kasar Amurka a wannan lokaci.

To sai dai kuma rahoton bai canja zaton bunkasuwar tattalin arzikin sabbin kasashen da suka fi samun ci gaban tattalin arziki da na kasashe masu tasowa ba.

Shugaban ofishin nazari na asusun IMF Maury Obstfeld ya yi nuni a gun taron manema labaru cewa, ko da yake an sassauta saurin bunkasuwar tattalin arzikin Sin, amma Sin ta kiyaye kasancewa kasar da ta fi sa kaimi ga bunkasuwar tattalin arzikin duniya. (Zainab)