Ministan harkokin albarkatun kwadago da zamantakewar al'ummar kasar Sin Yin Weimin ya bayyana a nan birnin Beijing a ranar 22 ga wata cewa, kasar Sin ta samar da ayyuka fiye da miliyan 65 a cikin shekaru 5 da suka gabata, wanda ya warware matsalar marasa ayyukan yi fiye da miliyan 27 da dubu 900.

A fannin tabbacin zamantakewar al'umma, Yin Weimin ya bayyana cewa, a shekaru 5 da suka gabata, an kafa tsarin inshorar kiwon lafiyar tsofaffi mazaunan birane da kauyuka na kasar Sin, wanda ya samar da inshorar ga mutane fiye da miliyan 900, yawan mutane da suka karbi inshorar kiwon lafiya a kasar Sin ya kai fiye da biliyan 1 da miliyan 300, ana iya cewa, dukkan mutanen kasar Sin suna da inshorar kiwon lafiya a halin yanzu. (Zainab)