Mataimakin shugaban kwamitin raya kasa da yin kwaskwarima na kasar Sin Wang Xiaotao ya bayyana a jiya Laraba cewa, a matsayin wani muhimmin kashi na dandanlin tattaunawar hadin gwiwa kan shawarar "ziri daya hanya daya", wakilan Sin da kasashen waje fiye da 1500 za su halarci taron kolin dandalin tattaunawar, ciki har da wakilai fiye da 850 da suka zo daga kasashe fiye da 130 da kungiyoyin duniya fiye da 70.

Wang Xiaotao ya bayyana a gun taron manema labaru da aka gudanar a wannan rana cewa, za a gudanar da taron kolin ne a ranar 14 ga wata, inda za a tattauna ababen more rayuwa, da zuba jari, da hadin gwiwar tattalin arziki da cinikayya, da makamashi, da hada-hadar kudi, da musayar al'adu, da yanayin halittu, da kuma hadin gwiwa a kan teku, don a gano hanyar da za a dosa.

Haka zalika, Wang Xiaotao ya ce, za a gudanar da cikakken zama daya da taruruka shida yayin da ake gudanar da taron kolin. Tarurukan shida za su maida hankali ga tuntubar juna kan manufofi, hadin gwiwar raya ayyukan more rayuwa, sa kaimi ga yin cinikayya cikin sauki, da hada-hadar kudi, da mu'amalar jama'a da kuma musayar ra'ayoyi a tsakanin masana. (Zainab)