A jiya Laraba gwamnatin Najeriya ta karyata rahotannin da ake bazawa cewa ta shigo da nau'in shinkafa da aka sauyawa kwayoyin hallita daga kasashen ketare.

Rahotannin da ake bazawa a shafuka sada zumunta na zargin gwamnatin cewa, ta yi amfani da wasu kamfanonin kasar inda ta cika kasuwannin kasar da nau'in shinkafa 'yar waje da aka sauyawa kwayoyin hallita.

Rufus Ebegba, babban daraktan hukumar kula da lafiyar tsirrai ta kasar NBMA, ya shedwa taron manema labarai a Abuja, babban birnin kasar cewa, maganganun da ake yadawa babu kamshin gaskiya.

Ebegba ya ce, babu wata nau'in shinkafa 'yar waje da aka sauyawa kwayoyin hallita da aka shigo da ita kasar a hukumance, ya kara da cewa, gwamnatin kasar ta sanya takunkumin shigo da shinkafa daga kasashen waje, kuma babu wasu alamu dake gwada cewa, an dage wannan takunkumi.

Ya ce, ana yada wannan jita jita ne domin haddasa matsaloli a kasar, don haka ya bukaci al'ummar Najeriya da su yi watsi da wadannan maganganun.(Ahmad Fagam)