Jiya Lahadi 31 ga watan Yuli, rana ce ta cika shekara daya da biranen Beijing da Zhangjiakou suka cimma nasarar samun damar karbar bakuncin gasar wasannin Olympics na lokacin hunturu a shekarar 2022. A daidai wannan lokaci, kwamitin shirya gasar ya gudanar da aikin "Aika da goron gayyata daga babbar ganuwa" a yankin Yanqing na birnin Beijing, da zummar neman tara fasalin bajon gasar wasannin Olympics na lokacin hunturu da na gasar nakasassu a shekarar 2022 daga jama'ar kasashe daban daban. A sa'i daya, tashar yanar gizo ta gasar wasannin biyu ta fara aiki a hukumance bisa adreshinsu na www.beijing2022.cn.

An ba da labari cewa, domin samun bajon gasanni mai kyau, za a gudanar da aikin tara fasalin bajon daga ranar 31 ga watan Yuli zuwa ranar 30 ga watan Nuwamban bana.(Fatima)