Hukumar 'yan sanda a Najeriya ta tabbatar da cewar, an kai hari kan kayayyakin kamfanin hakar mai na Shell a yankin Awarra dake jihar Imo kudu maso gabashin kasar.
Precious Okolobo, shi ne mai magana da yawun kamfanin na Shell, ya ce, dama an dakatar da amfani da bututun dake tura mai zuwa Awara, tun a ranar 8 wa watan nan da muke ciki, sakamakon mai da yake malala a yankin Okolo da Bonny na jihar Rivers.
Babu wata kungiya da ta yi ikirarin daukar nauyin harin, ko da yake dama dai kungiyar tsagerun yankin mai suna Niger Delta Avengers ta sha alwashin kaddamar da hare hare kan kayayyakin samar da man fetur da iskar gas na kasar dake yankin.(Ahmad Fagam)
