Hukumar sayar da hannayen jari ta Najeriya wato NSE a takaice ta bullo da wani sabon tsari da zai hade dukkan masu sayar da hannayen jari a kasar karkashin wani tsarin sayar da hannayen jari na zamani, maimakon salo na dauri da ake amfani da takardu.

Da ya ke yiwa taron manema labarai karin haske game da sabon tsarin a birnin Legas cibiyar kasuwancin kasar, darektan hukumar ta NSE Ade Bajomo ya ce, hukumar ta dauki wannan muhimmin mataki ne ta yadda tsarin hada-hadar hannayen jarin kasar zai dace da matsayin kasa da kasa.

Ya ce, sabon tsarin hada-hadar zai baiwa 'yan Najeriya da sauran masu sha'awar zuba jari damar zuba dukiyarsu a kasuwannin hannayen jari ta wayoyinsu na salula ba tare da wata fargaba ba.

Darektan ya shaidawa manema labarai cewa, sabon tsarin hada-hadar hannayen jari ta wayar salulan zai karawa tsarin cinikayyar hannayen jari martaba da kuma saukin shiga kasuwannin.(Ibrahim)