Manoma guda 8 ne suka rasa rayukansu sanadiyar harbe su da wadansu da ake zaton 'yan kungiyar Boko Haram ne suka yi a wani kauye kusa da garin Maiduguri na jihar Borno dake arewa maso gabashin kasar Nigeriya.
Kamar yadda majiyar tsaro ta tabbatar, an harbi manoman ne a ranar Talata lokacin da suke kokarin tsere wa farmakin 'yan kungiyar ta Boko Haram da suka kai musu hari a kauyen Jakana dake da nisan kilomita 50 daga birnin na Maiduguri.
An yi wa manoman kawanya, sannan 'yan bindigar sun bude musu wuta bayan da suka afka wa kauyen a kan babura. Iyalan mamatan sun yi musu jana'izar a ranar Laraban nan.
Tun da farko dai shugaban Nigeriya Muhammadu Buhari ya riga ya umurni manyan hafsoshin tsaron kasar da su tabbatar da kawo karshen harin 'yan kungiyar nan da karshen wannan shekara.(Fatimah)
