An kashe a kalla mutane 31 a ranar Lahadi a cikin gumurzu tare da mayakan kungiyar IS a yankin Anbar, dake yammacin kasar Iraki. Harin mafi muni ya faru ne a lokacin da wasu 'yan kunar bakin wake biyu suka kutsa da motocinsu dauke da boma bomai a sansanin soja dake kunshe da sojojin Iraki da mayakan sa kai dake mara musu baya da ake kira Hachd Chaabi, a gabashin birnin Falloujah mai tazarar kilomita 50 daga yammacin Bagadaza dake hannun kungiyar IS, lamarin da ya yi sanadiyyar mutuwar sojoji da kuma mayakan sa kai 12, a cewar wata majiyar tsaro a wurin, da ta bukaci a sakaya sunanta.
Fashewar boma-bomai sau biyu sun biyo bayan gumurzu tare da mayakan kungiyar IS kusan goma, in ji wannan majiya, inda ta kara da cewa, ba a tantance adadin mayakan kungiyar IS da suka mutu ba, amma an kashe da dama daga cikinsu, da jikkata wasu a cikin gurmurzun. (Maman Ada)
