Rahotanni daga jihohin Gombe da Plateau dake tarayyar Najeriya, na cewa, a kalla mutane 17 ne aka tabbatar da rasuwarsu, biyowa bayan wasu sabbin hare-hare da aka kaddamar a jiya Laraba.
Kakakin rundunar 'yan sandan jihar Gombe Fwaje Atajiri, ya shaida wa majiyarmu cewa, wasu mahara sun hallaka mutane 9, baya ga wasu da dama da suka ji raunuka, yayin wasu hare-hare 2 da suka kaddamar. Ya ce, tuni aka garzaya da gawawwakin wadanda suka rasu zuwa asibitin kwararru na gwamnati dake birnin na Gombe.
A jihar Plateau wadda ke tsakiyar Najeriya kuwa, mutane 8 ne aka tabbatar sun rasa rayukansu, a wasu hare-hare biyu da suka auku a karamar hukumar Barkin Ladi duka dai a jiyan.
Ganau sun bayyana cewa, an hallaka mutum guda a cikin gidansa, sai kuma wasu mutane 3 da aka yiwa kwantan bauna, yayin da sauran mutanen 4 suka rasu a yayin da aka kai musu hari a wata mashaya. (Saminu)
