Rundunar 'yan sandan Najeriya reshen jihar Yobe dake arewa maso gabashin Najeriya, ta ce, ta gano wasu tarin makamai da suka hada da bindigogi, da harsasai da kuma bama-bamai cikin wata motar mayakan Boko Haram.
A cewar kwamishinan 'yan sandan jihar ta Yobe Markus Danladi, jami'an 'yan sandan na gudanar da binciken ababen hawa ne a ranar Litinin, a kan babbar hanyar da ta hada birnin Damaturu zuwa Maiduguri, lokacin da wasu 'yan kunar bakin wake biyar suka lura cewa, za a gano su, sai suka tada bam dake cikin wata mota kirar Jeep da suke ciki, inda nan take suka hallaka kansu, da kuma wasu 'yan sanda 3, kana wasu 'yan sandan 2 suka samu raunuka.
Har wa yau kwamishinan 'yan sandan ya bayyana gano wasu karin makamai iri daban daban daga mayakan na Boko Haram, wadanda jami'an tsaro suka dakile shirinsu na kaddamar da hari kan garin Bara. (Saminu)
