Rundunar sojojin Najeriya ta ce, ta fatattaki mayakan kungiyar Boko Haram daga dajin Alagarno, dake jihar Borno a arewa maso gabashin kasar, sakamakon farmakin da suka kaddamar a dajin a ranar Talata.
Cikin wata sanarwa da rundunar ta fitar, kakakinta Sani Usman, ya ce, rundunar hadin gwiwa, tare da tallafin sojojin Najeriyar sun samu nasarar korar mayakan na Boko Haram daga sansanonin su biyu da suke wa lakabi da Falluja da Timbuktu.
Baya ga kasancewar dajin na Alagarno, mafaka ga mayakan na Boko Haram, rahotanni sun nuna cewa, ya kasance daya daga hanyoyin da suke amfani da su wajen shiga garuruwan dake yankin. (Saminu)
