Sojojin kasar Chadi tara suka mutu a yayin da goma sha shida suka jikkata a cikin wani artabo a ranar Laraba tsakanin sojojin kasashen Chadi da Nijar da mayakan kungiyar Boko Haram, a cewar wata sanarwa ta hedkwatar rundunar sojojin kasar Chadi a ranar Alhamis.
Wannan adadi ya shafi kawai sojojin Chadi, in ji sanarwar, tare da bayyana an kashe mayakan Boko Haram kusan dari tare da lalata kayayyakinsu da dama. Kazamin fadan ya barke tsakanin garin Malam Fatori dake Najeriya da garin Bosso dake Nijar.
Sojojin Chadi da na Nijar sun ci karo da juriyar wasu mayakan Boko Haram, amma bayan gumurzu, sojojin Chadi da na Nijar sun samu nasarar kawar da mayakan Boko Haram daga wannan yankin, in ji wannan sanarwa. (Maman Ada)
