Wakiliyar kungiyar EU mai kula da harkokin waje da manufofin tsaro Federica Mogherini, ta gudanar da ziyarar aiki ta kwanaki biyu a kasar Cuba yau 23 ga wata. Wannan ne dai karon farko da wata babbar jami'ar harkokin wajen kungiyar ta EU ta kai ziyara a kasar Cuba. A daidai gabar da ake kokarin mayar da dangantakar diplomasiyya tsakanin Amurka da Cuba daga farkon wannan shekara ta bana.

Ana dai kallon wannan ziyara ta Mogherini a matsayin wani mataki da zai kara sa kaimi ga mu'amala tsakanin kasashen Turai da Cuba.

Hukumar harkokin waje ta kungiyar EU ta yi bayanin cewa, lokacin wannan ziyara da Mogherini ta kai yana da muhimmancin gaske wajen gudanar da shawarwari tsakanin EU da kasar Cuba. Kuma Mogherini za ta gana da ministan harkokin wajen kasar Cuba Bruno Rodriguez, da sauran jami'an kasar domin tattauna batutuwa game da hadin gwiwar dake tsakanin bangarorin biyu, da ma sauran batutuwa. (Zainab)