Tunisia ta samu nasarar doke Zambia da ci 2 da 1, yayin wasan rukunin B da kasashen biyu suka buga a jiya Alhamis. Wannan sakamakon dai ya baiwa Tunisian damar darewa matsayin farko a teburin rukunin na biyu da maki 4.
Yan wasan Tunisia Yasine Chikhaoui, da Ahmed Akaichi ne dai suka zura kwallayen biyu a ragar Zambia, yayin da 'dan wasan Zambia Emmanuel Mayuka, ya zura kwallo daya tilo ga kasarsa.
A daya wasan da aka buga a jiyan kuwa, jamhuriyar dimokaradiyyar Congo ta tashi wasan ta Cape Verde babu ci.
A wasanta na gaba, Tunisia za ta kara ne da jamhuriyar dimokaradiyyar Congo, a ranar Litinin a filin wasa na Bata, yayin da ita kuma Zambia za ta fafata da Cape Verde a Ebebiyin. (Saminu)
