Yanzu dai ta tabbata cewa, 'dan wasan kasar Zambia Nathan Sinkala ba zai buga gasar cin kofin kwallon kafa ta Afirka AFCON na wannan shekara ba sakamakon raunin da ya ji a gwiwarsa.
Likitan 'yan wasan Dr. Joseph Kabungo wanda ya tabbatar da hakan ya ce, 'dan wasan ya ji rauni a gwiwartsa ce ranar Lahadi a lokacin karawar su da jamhuriyar demokiradiyar Congo.
Kabungo ya ce, rashin Sinkala a tawagar ta Zambia ba karamin koma baya ba ne ga tsaron bayan kungiyar.
Kasar Zambia wadda ta lashe kofin a gasar da aka fafata a shekarar 2012 za ta kara ne da kasar Tunisia a ranar 22 ga wannan wata a filin wasa na Ebebiyin, yayin da a ranar 26 ga wata kuma za su yi wasansu na karshe a rukuni na biyu (B) da kasar Cape Verde. (Ibrahim)
