Ma'aikatar shari'ar kasar Amurka, ta bayyana sunayen wasu Amurkawa biyu da za su gurfana gaban kuliya, bisa zargin tallafawa yunkurin juyin mulki a kasar Gambia.
A cewar wata sanarwa da ofishin mai gabatar da kara Eric Holder ya fitar, Cherno Nije, da Papa Faal za su fuskanci shari'a ne, bayan da aka zarge su da shiga kasar Gambia, domin taimakawa yunkurin da aka yi na kifar da gwamnatin shugaba Yahya Jammeh a ranar Talatar makon jiya, sa'an nan suka koma Amurka bayan juyin mulkin ya ci tura.
Tuni dai aka cafke mutanen biyu bayan saukar su kasar Amurka.
Sanarwar ta ce, mutanen biyu sun kitsa aikata mummunan laifi da ya shafi wata kasa ta waje, wanda hakan ya sabawa dokar kasar Amurka, don haka ya zama wajibi su fuskanci hukuncin laifin da suka aikata. (Saminu)
