Mahukuntan kasar Libya sun bayyana sakin wasu mutane dake cikin wani jirgin sama su 4, wadanda aka tsare a kasar tun ranar 14 ga watan Nuwamba, bisa zargin keta sararin saman kasar ba tare da neman izini ba.
Rahotanni na cewa, jirgin na dauke ne da mutane 7, ya kuma kutsa sararin saman Libyan daga hadaddiyar daular Larabawa dauke da kayayyakin jin kai wadanda za a kai kudancin kasar.
A cewar ministan harkokin wajen kasar, tsagin masu ra'ayin Islama Mohamed Al-Ghirani, an saki mutane 4 cikin fasinjojin jirgin su 7 ne bisa umarnin babban mai shari'ar kasar, yayin da sauran ukun ke ci gaba da fuskantar tuhuma.
Kawo yanzu dai kasar Libya na fama da sa-in-sa daga bangarori biyu, wadanda kowanensu ke da'awar iko da kasar. Ana kuma danganta matsalolin siyasar kasar da faduwar gwamnatin tsohon shugaban kasar Muammar Gaddafi a shekarar 2011 da ta gabata. (Saminu)
