Hedkwatar tsaron Najeriya ta bayyana cewa, dakarunta da ke aiki a jihohin Borno da Bauchi sun kashe mayakan Boko Haram a kalla 27 a kokarin da suke na kakkabe ayyukan 'yan ta'adda a yankunan.
Wata sanarwa da hedkwatar tsaron Najeriyar ta fitar a ranar Talata ta ce, an halaka 7 daga cikin mayakan yayin wani bata kashi da sojojin a yankin Hildi da ke jihar Adamawa. Bugu da kari sojojin sun yi nasarar kashe wasu mayakan Boko Haram 20 yayin da suka kaddamar da wani samame na musamman a dazukan Balmo da Lame da suka hade jihohin Borno da Bauchi da kuma Adamawa.
Sanarwar ta ce, yayin wadannan bata kashi, sojojin sun kuma yi nasarar kwace albarusai da kwari da baka da motoci da wasu makamai da kuma takardun da ke kunshe da sunayen wasu wurare da dakarun suka tsara kai hare-hare da yankunan da suke zirga-zriga a jihar Adamawa.
Kakakin hedkwatar tsaron ta Najeriya Chris Olukolade ya tabbatar da cewa, an raunata dakarun su 6 a wadannan bata kashi. (Ibrahim)
