Jakadan Sin dake kasar Britaniya Liu Xiaoming ya gana da shugaban hukumar shari'a ta gwamnatin yankin Hongkong Rimsky Yuen a ranar 15 ga wata a ofishin jakadancin Sin dake Britaniya, inda Liu Xiaoming ya bayyana cewa, harkokin yankin Hongkong har da batun yin kwaskwarima ga harkokin siyasar yankin dukkansu harkokin cikin gida ne na kasar Sin, don haka ya riga ya bayyana matsayin kasar Sin kan wannan batu ga gwamnatin kasar Britaniya, da majalisar dokoki da kafofin watsa labaru na kasar, inda ya kalubalanci bangaren Britaniya da ya yi taka tsantsan, sannan kada ya tsoma baki cikin harkokin cikin gida na yankin Hongkong da kuma na kasar Sin.

Liu Xiaoming ya bayyana cewa, aikin "mamaye cibiyar kasuwanci" da daliban yankin Hongkong suke yi ya saba wa dokokin yankin, tare da kawo illa ga zaman lafiya, da yanayin bunkasuwar tattalin arziki, tare da zubar da mutuncin yankin a idon duniya. Gwamnatin yankin Hongkong da gwamna Leung Chun Ying ke jagoranta ta daidaita aikin "mamaye cibiyar kasuwanci" yadda ya kamata, ta haka a tabbatar da zaman lafiya a yankin tare da kare rayuka da dukiyoyin jama'ar yankin, wannan ya dace da fatan yawancin jama'ar yankin, kana ya shaidawa duniya karfin gwamnatin yankin na gudanar da ayyuka bisa doka.

A nasa bangare, Rimsky Yuen ya bayyana cewa, manufar ziyararsa a wannan karo ita ce yin bayani game da aikin gina cibiyar yanke hukunci da bada hidimar dokoki ta yankin Hongkong ta yadda kasashen duniya za su kara fahimtar halin da ake ciki a yankin. Ya ce, ya kamata gwamnatin Sin da gwamnatin yankin Hongkong su daidaita harkokin yankin, tsoma baki da sauran kasashen duniya suke yi zai kawo illa ga ci gaban demokuradiyya a yankin Hongkong. (Zainab)