Babban magatakardar MDD Ban Ki-moon a ranar Lahadin nan ya gana da shugabar kwamitin tarayyar kasashen Afrika AU Madam Nkosozana Dlamini-Zuma, inda gaba dayansu suka yi alkawarin inganta hadin gwiwa a tsakanin su a bangaren zaman lafiya da tsaro.
A lokacin ganawar tasu, shugabannin biyu sun tattauna dabarun inganta hadin gwiwa tsakanin cibiyoyin biyu, da kuma hanyoyin da za'a ci gaba da bi domin ganin an inganta hadin gwiwa a wadannan bangarorin biyu, in ji kakakin majalissar a bayanin da ya yi wa manema labarai.
Haka kuma a lokacin ganawarsu, Mr. Ban da Madam Zuma sun yi nazarin kalubalen da zaman lafiya da tsaro ke fuskanta a nahiyar ta Afrika, musamman a kasashen Libya, Mali, yankin Sahel, Somaliya, Sudan ta Kudu da yankin babban tabkin Afrika, in ji kakakin majalissar.
Mr. Ban daga bisani ya jaddada aniyar majalissar ta ganin hadin gwiwa da kungiyar ta AU, kuma ya bayyana irin kokarin da majalissar take wajen taimakawa kasashen yammacin nahiyar na ganin sun dakile annobar nan ta Ebola. (Fatimah)
