Jami'an tsaron kasar Kenya sun tsaurara matakan tsaro a gundumar Lamu, bayan da wasu dakaru dauke da makamai suka kaiwa kauyen Pandanguo farmaki a daren ranar Asabar.
A cewar rundunar 'yan sanda, bata garin sun kone gidaje, da wata makaranta, tare da lalata wani asibitin shan magani, kafin su wawashe kayan amfanin gona da aka adana a wani dadin ajiya, a wata gona dake dajin Boni, mai makwaftaka da teku.
Har ila yau rundunar 'yan sandan ta ce, wasu rukunin maharan, sun yi garkuwa da wata babbar mota, dake makare da kayan abinci a yankin Hindi, suka kuma sace kayan da take dauke da su.
Da yake karin haske game da aukuwar lamarin, kwamishinan gundumar ta Lamu Miiri Njenga, ya ce, a watan Yunin da ya gabata ma dai irin wannan hari ya janyo asarar rayukan mutane 60, tare da raba daruruwan fararen hula da gidajen su. (Saminu)
