Gwamnatin kasar Kenya za ta kashe dalar Amurka miliyan 141 sayen wani tsarin sadarwa da sanya ido domin taimakawa jami'an tsaron kasar wajen karfafa tsaro a cikin wannan kasa dake gabashin nahiyar Afrika.

Shugaban kasar Kenya Uhuru Kenyatta ya bayyana cewa, kamfanin Safaricom, za'a baiwa nauyin aiwatar da wannan tsarin sanya ido da sadarwa na tsaron jama'a, kuma za'a kammala shi a cikin watanni hudu masu zuwa.

Ina son a kammala shi cikin gaggawa, domin wannan tsari na da muhimmanci ga tsaron kasarmu, in ji mista Kenyatta, tare da bayyana cewa, fatansa shi ne, na ganin wannan aiki ya tabbata cikin gajeren lokaci. Wannan tsarin sanya ido zai hada duk wasu cibiyoyin dake kula da harkokin tsaro, ta yadda za'a tattara bayanai cikin hadin gwiwa da hedkwatar dake kula da ayyukan tsaro. (Maman Ada)