Ranar 26 ga wata, rana ce ta yaki da miyagun kwayoyi ta duniya. Domin wannan rana ta musamman, shugaban kasar Sin Xi Jinping ya ba da umurnin yaki da miyagun kwayoyi a kasar, inda ya jaddada cewa, kamata ya yi gwamnatoci da kwamitocin JKS a matakai daban-daban su fahimci babban hadarin miyagun kwayoyi da muhimmancin yakar su, nauyi ne a kansu su dauki kwararran matakai domin gudanar da ayyukan yaki da miyagun kwayoyi cikin dogon lokaci.

Dadin dadawa, shugaba Xi ya bayyana cewa, aikin yaki da miyagun kwayoyi na da muhimmanci kwarai wajen tabbatar da zaman lafiya da kwanciyar hankali da kawo alheri ga jama'a. A cikin 'yan shekarun da suka wuce, hukumomi a wurare daban daban sun aiwatar da manufofin yaki da miyagun kwayoyi da kwamitin tsakiyar JKS ya gabatar,inda suka yi gwagwarmaya tare da cimma babbar nasara. Kawo yanzu dai, ana ci gaba da fuskantar babban kalubale wajen yaki da miyagun kwayoyi a Sin, shi ya sa dole ne a ci gaba da yin kokari don ganin an kawar da wannan matsala.(Fatima)