Shugaba Uhuru Kenyatta na kasar Kenya, ya ce, gwamnatinsa na shirin fidda wani sabon tsarin inganta ayyukan hukumomin tsaron kasar. A wani mataki na karfafa ikon su, na fuskantar dukkanin wani kalubalen tsaro, ciki hadda na 'yan ta'adda da ka iya tunkarar kasar.

Shugaba Kenyatta ya bayyana hakan ne a jiya Alhamis, lokacin da yake gabatar da jawabi, gaban kusoshin gwamnatinsa, yayin wani taron inganta makamar aiki dake gudana a Nanyuki. Ya ce, za a kara yawan kudaden da ake kebewa harkokin tsaro, ta yadda jami'an tsaron za su samu damar gudanar da ayyukansu yadda ya kamata.

Karin matakan da za a dauka domin inganata harkar tsaron, a cewarsa, sun hada da horas da ma'aikata, da samar da ababen hawa, da kayan aiki na zamani, da kuma gina gidaje ga jami'an tsaron.

A nata tsokaci, sakatariyar tsaron majalissar zartaswar kasar Raychelle Omamo, jinjinawa wannan aniya ta gwamnati ta yi, tana mai cewa, matakin zai karfafa burin kasar, na kare ikon kai da martabarta.

Kasar Kenya dake gabashin nahiyar Afirka dai, na fuskantar kalubalen tsaro, musamman yakin da take yi da 'yan tada kayar baya a yankunan gabar tekunta, da kuma mayakan kungiyar Al-Shabaab ta Somaliya mai alaka da Al-Qaida. (Saminu)