Firaministan kasar Sin Li Keqiang ya dawo nan kasar Sin a safiyar Litinin din nan, bayan ziyarar aiki da ya gudanar a Habasha, da Najeriya, da Angola da kuma kasar Kenya.
Yayin ziyarsa a Habasha, Mr. Li ya halarci helkwatar kungiyar tarayyar Afirka ta AU dake birnin Addis Ababan kasar ta Habasha. Ya kuma halarci taron tattalin arziki na duniya da aka gudanar kan Afirka a Abuja, fadar gwamnatin Najeriya.
Wannan ziyara dai da firaministan kasar Sin ya gudanar a nahiyar ta Afirka, ita ce ta farko tun bayan da ya dare mukaminsa a shekarar 2013 da ta gabata, ya kuma gudanar da ziyarar ne tare da uwargidansa Madam Cheng Hong. (Saminu)
