Rundunar sojan Najeriya ta ce, ta halaka 'yan kungiyar Boko Haram 38 a jihar Borno da ke arewa maso gabashin kasar, bayan da rundunar ta yi nasarar murkushe wani hari da 'ya'yan kungiyar suka shirya kaiwa a garin Damboa.

Kakakin runduna ta 7 ta sojojin kasar kanar Muhammad Dole ne ya bayyana hakan ranar Alhamis cikin wata sanarwa da aka rabawa manema labarai a Maiduguri, babban birnin jihar Borno da ke fama da tashin hankali.

Ya ce, maharan sun shirya kai hari garin na Damboa ne, da nufin haifar da tashin hankali, amma rundunar ta yi nasarar murkushe harin, sakamakon bayanan da suka samu a kan lokaci da kuma yadda suka baza jami'an su a ko wane lungu da sakon jihar.

Kakakin rundunar ya kuma bayyana cewa, sun samu nasarar kwace motoci guda 3, ciki har da wata babbar mota makare da kayan abinci, manya da kananan bindigogi, bindiga kirar AK-47 guda 2.

Ya zuwa yanzu, dakarun hadin gwiwa na sojan kasa da na sama suna farautar sauran maharan da suka gudu, yayin da suka sa-ido a yankin na Damboa da sauran kauyukan da ke kewaye da shi. (Ibrahim)