A cikin sakon ta'aziyyar da ya aika wa takwaransa na Afirka ta Kudu Jacob Zuma, shugaban Najeriya Goodluck Jonathan ya bayyana cewa, al'umma za ta dade tana tunawa tare da girmama shugaban Afirka ta Kudu bakar fata na farko marigayi Nelson Mandela saboda namijin kokarin da ya yi wajen 'yantar da su.

Bugu da kari a wasikar, shugaba Jonathan ya bayyana bakin cikinsa dangane da rasuwar Madiba, inda ya kara bayyana shi a matsayin mutum mai hangen nesa, karfin hali da sanin ya kamata, kana jagoran shimfida mulkin demokiradiya na gaskiya.

Ya kuma yi amfani da wannan dama wajen mika alhinin 'yan Najeriya ga shugaba Zuma da daukacin al'ummar kasar Afirka ta Kudu, yayin da suke makokin marigayi Mandela, gwarzon yaki da nuna wariyar launin fata.(Ibrahim)