Babban magatakardar MDD Ban Ki-Moon a ranar Laraban nan ya yi tir da kisan wani ma'aikacin wanzar da zaman lafiya, 'dan asaslin kasar Tanzaniya, sannan aka jikkata wassu guda 10 a lokacin wani sabon arangama a kudancin kasar jamhuriyar demokradiya na Congo DRC duk a rana daya.
A cikin bayanin da aka fitar ma manema labarai, wannan harin dai ya faru ne lokacin da hukumar wanzar da zaman lafiyar ta majalissar a kasar suka goyi bayan ayyukan sojojin kasar ta Congo don su kare lafiyar fararen hula dake zaune a garin Goma.
Mr. Ban ya mika ta'aziyyarsa ga iyalan mamacin da kuma jajensa da wadanda suka raunana, da ma ita kanta gwamnatin kasar Tanzaniya.
Zaman dar dar a yankin yana karuwa bayan da kungiyar M23 suka bayyana a fili cewar, kungiyar wanzar da zaman lafiyar ta MDD MONUSCO ta hada baki da gwamnatin kasar, inda ta samar masu karin dakarun soja, abin da ya saba yarjejeniyar da aka cimma a birnin Kampala. (Fatimah)
