Abdi Ibrahim Shamow, shi ne kwamandan 'yan sandan yankin Shabelle inda a can ne garin Janale yake, ya ce, tun da safiyar Litinin ne dakarun na hadin gwiwa suka kwace ikon garin daga hannun mayakan Al-Shabaab cikin ruwan sanyi.
Ya kara da cewa, mayakan Al-Shabaab sun yi yunkurin musayar wuta da dakarun na AMISOM, amma sun gagara, lamarin da ya sa suka fice daga garin babu shiri, sai dai ba a samu zub da jini ba a wannan karo.
A 'yan kwanakin nan dakarun hadin gwiwar suna ta gudanar da sintiri a yankunan.
A watan Satumban bara ne, mayakan Al-Shabaab suka kaddamar da mummunan hari kan dakarun na AMISOM a sansaninsu dake Janale, lamarin da ya haddasa mutuwar sojoji 70.
Kungiyar mai tsattsauran ra'ayin Islama ta jima tana fafatawa da dakarun gwamnatin Somaliya tare da kuma kaddamar da hare-hare a fadin kasar. (Ahmad)
