Sabon jakadan Netherland a Benin, Van Dyck Henricus Joannes Joseph, ya tabbatar wa shugaban Benin Boni Yayi a ranar Asabar a birnin Cotonou, hedkwatar tattalin arzikin kasar, nashi goyon baya wajen sake maido da huldar dangantaka tsakanin kasarsa da Benin, da aka dakatar da ita a cikin watan Mayun da ya gabata, bayan an yi ribda da ciki da Sefa biliyan 2,6, da kasar Netherland ta bayar domin kafa ayyukan samar da ruwa sha masu tsafta a yankunan matalauta na Benin.

A yayin ganawarsa tare da shugaba Boni Yayi, da farko ya yi wa Boni Yayi godiya kan yadda ya kula da huldar dangantaka tsakanin kasashen biyu, da kuma kokarinsa wajen ganin an maido da huldar dangantaka. Mista Van Dyck Joseph ya tabbatar masa da nasa goyon baya, wajen maido da dangantaka har ma da kulawa da ita yadda ya kamata, in ji mista Joannes Joseph.

Netherland da Benin sun rattaba hannu kan wata yarjejeniyar aiwatar da tsarin tallafawa bangaren samar da ruwa da tsaftace muhalli (PPEA-II) kashi na biyu bisa kudin Sefa biliyan 40,524 a tsawon lokacin shekarar 2013 zuwa shekarar 2015.

Wannan tsari na da nufin tabbatar da samar da ruwa sha ga al'ummomin kasar Benin, magance hadarukan dake da nasaba ga kulawa da ruwa da bada taimako wajen bunkasa aikin kula da tsaftar jiki da tsaftace muhalli tun daga tushe. (Maman Ada)