An kashe mayakan da ake zargin 'yan kungiyar Boko Haram sama da 50, a wani hari da sojojin suka kai a jihar Borno, wacce ke arewa maso gabashin tarayyar Najeriya, inda kuma nan ne, kungiyar ta Boko Haram ta yi kaka-gida.
Kakakin sojojin Najeria, Chris Olukolade ya bayyana a cikin wata sanarwa cewar, sojojin dake yankin sun kuma dakile wani hari da 'yan kungiyar Boko Haram suka shirya kaiwa a karshen mako, a kan wasu kauyuka na jihohin Borno da Adamawa.
Sanarwar kakakin sojojin Nigeriyar, ta ce, 'yan ta'addan suna kan hanyarsu ta kai hare-hare ne a kan wasu kauyukan, da ke kan hanyar Bilta a jihar Borno, a inda sai sojojin Najeria suka yi masu kwantan bauna.
Sanarwar ta ce, kungiyar tana muradin kafa shari'ar musulunci a kasar ta Afrika ta yamma, wacce ke amfani da tsarin damokradiyya. (Suwaiba)
